四大花費最高嘅旅遊勝地（衣食住篇）

#CKKTIPS 嗱嗱嗱，又踏入新一年，我問你地，做人最緊要係咩？ 無錯，就係有Plan⋯⋯ning啦！所以， 大家又係時候Plan下2019年去邊好！以下係全球生活成本最高嘅四個城市，快啲睇下有無你嘅外遊心水地方啦！有嘅話快啲Tag埋同行金主，一齊有個心理準備啦😆

第一位：蘇黎世🇨🇭 位於瑞士嘅蘇黎世係歐洲生活成本排名最高嘅城市。瑞士一向係全球最富裕嘅國家，人均財富更加係排名世界第一，所以生活成本高都唔出奇。例如食個普通麥記餐都分分鐘過百蚊，連去公共洗手間都要收費十蚊！

第二位：巴黎🇫🇷 巴黎同歐洲其他城市相比，只有酒類同煙草價格比較平易近人，其餘物價都好貴！如果您想享受法國美食，又想慳錢，建議喺午餐時間惠顧心儀餐廳，因為大部份法國餐廳嘅午餐都會比晚餐平好多架！

第三位：紐約🇺🇸 紐約係美國生活指數最高嘅城市。紐約嘅住宿費價格不菲，尤其係曼哈頓區更加貴得驚人，淨係住酒店，平均都要大概$25000港幣！不過都有一啲免費又值得去嘅地方，例如唔少博物館同藝術館都係免費開放，感受一下文化氣息嘅同時，又可以慳返一筆啦！

第四位：哥本哈根🇩🇰 丹麥嘅物價好高，哥本哈根係當中嘅佼佼者。一杯咖啡嘅價錢大概比美國貴三至四倍。同歐洲其他知名首都相比，哥本哈根市中心面積比較狹小，但正正因為商業活動區好集中，旅客只需要靠雙腳，就可以喺各大美術館、設計商店穿梭，也隨時可以搵到特色小店歇息，享受城市高質素嘅氛圍。

今次為大家介紹咗生活水平最高嘅城市，下一次會為大家推薦一啲較難踏足嘅旅遊探險地、一生必須去一次嘅地方！